ਮਨੋਰੰਜਨ ਜਗਤ ਦੀ ਸਾਲ 2021-22 ਦੀ ਪਾਲੀਵੁੱਡ ਡਾਇਰੈਕਟਰੀ ਹੋਈ ਰਿਲੀਜ਼

ਪੰਜਾਬੀ ਇੰਟਰਨੇਮੈਂਟ ਇੰਡਸਟਰੀ ਨੂੰ ਇਕੋ ਕਿਤਾਬ ’ਚ ਕੀਤਾ ਬੰਦ

432 ਪੰਨਿਆਂ ਦੀ ਇਸ ਡਾਇਰੈਕਟਰੀ ’ਚ ਮਿਲੇਗੀ ਹਰ ਪੰਜਾਬੀ ਫਿਲਮ ਦੀ ਜਾਣਕਾਰੀ

ਚੰਡੀਗੜ੍ਹ, ਫਰਵਰੀ  :

ਕਿਸੇ ਵੀ ਖ਼ੇਤਰ ’ਚ ਅੱਗੇ ਵਧਣ ਲਈ ਉਸ ਖੇਤਰ ਦੀ ਪੁਖਤਾ ਜਾਣਕਾਰੀ ਤੇ ਨੈਟਵਰਕ ਦਾ ਹੋਣਾ ਬੇਹੱਦ ਜ਼ਰੂਰੀ ਹੈ। ਬਿਨਾ ਨੈਟਵਰਕ ਅਤੇ ਜਾਣਕਾਰੀ ਤੋਂ ਕਿਸੇ ਵੀ ਫੀਲਡ ਸਫਲਤਾ ਸੰਭਵ ਨਹੀਂ। ਇਸੇ ਗੱਲ ਨੂੰ ਹੀ ਧਿਆਨ ’ਚ ਰੱਖਦਿਆਂ ਫ਼ਿਲਮ ਪ੍ਰਚਾਰਕ ਤੇ ਲੇਖਕ ਸਪਨ ਮਨਚੰਦਾ ਨੇ ਪੰਜਾਬੀ ਮਨੋਰੰਜਨ ਜਗਤ ਨਾਲ ਸਬੰਧਿਤ ਅਜਿਹੀ ਇਨਫਰਮੇਸ਼ਨ, ਡਾਟਾ ਤੇ ਟੈਲੀਫ਼ੋਨ ਡਾਇਰੈਕਟਰੀ ਤਿਆਰ ਕੀਤੀ ਹੈ ਜੋ ਕਿਸੇ ਰੋਡਮੈਪ ਤੋਂ ਘੱਟ ਨਹੀਂ ਹੈ। ਇਸ ਟੈਲੀਫ਼ੋਨ ਡਾਇਰੈਕਟਰੀ ਨੂੰ ਅੱਜ ਇਥੇ ਚੰਡੀਗੜ੍ਹ ਪ੍ਰੈਸ ਕਲੱਬ ਵਿਖੇ ਨਾਮਵਰ ਗਾਇਕ ਤੇ ਅਦਾਕਾਰ ਹਰਭਜਨ ਮਾਨ, ਪੰਜਾਬੀ ਗਾਇਕ ਰਣਜੀਤ ਬਾਵਾ ਅਤੇ ਨਾਮਵਰ ਕਾਮੇਡੀਅਨ ਗੁਰਪ੍ਰੀਤ ਘੁੱਗੀ ਵੱਲੋਂ ਸਾਂਝੇ ਤੌਰ ’ਤੇ ਰਿਲੀਜ਼ ਕੀਤਾ ਗਿਆ। ਇਸ ਮੌਕੇ ਇਨ੍ਹਾਂ ਹਸਤੀਆਂ ਤੋਂ ਇਲਾਵਾ ਪੰਜਾਬ ਫ਼ਿਲਮ ਸਿਟੀ ਦੇ ਮੁਖੀ ਇਕਬਾਲ ਚੀਮਾ ਸਮੇਤ ਕਈ ਹੋਰ ਚਿਹਰੇ ਵੀ ਹਾਜ਼ਰ ਸਨ।
ਇਸ ਮੌਕੇ ਸਪਨ ਮਨਚੰਦਾ ਨੇ ਦੱਸਿਆ ਕਿ ਉਨ੍ਹਾਂ ਦੀ ਟੀਮ ਵੱਲੋਂ ਹਰ ਦੋ ਸਾਲਾਂ ਬਾਅਦ ਪੰਜਾਬੀ ਇੰਡਸਟਰੀ ਦੀ ਇਕ ਟੈਲੀਫ਼ੋਨ ਡਾਇਰੈਕਟਰੀ ਤਿਆਰ ਕੀਤੀ ਜਾਂਦੀ ਹੈ ਪਰ ਇਸ ਵਾਰ ਇਸ ਦੇ ਪੰਜਵੇਂ ਐਡੀਸ਼ਨ ਨੂੰ ਇੱਕ ਵੱਖਰਾ ਤੇ ਮਹੱਤਵਪੂਰਨ ਰੂਪ ਦਿੱਤਾ ਗਿਆ ਹੈ। ਸਾਲ 2021 ਅਤੇ 22 ਦੀ ਇਸ ਡਾਇਰੈਕਟਰੀ ’ਚ ਨਾ ਸਿਰਫ ਮਨੋਰੰਜਨ ਜਗਤ ਨਾਲ ਸਬੰਧਿਤ ਚਿਹਰਿਆਂ ਦੀ ਸੰਪਰਕ ਜਾਣਕਾਰੀ ਉਨ੍ਹਾਂ ਦੀ ਤਸਵੀਰ ਸਮੇਤ ਸ਼ਾਮਲ ਕੀਤੀ ਗਈ ਹੈ ਬਲਕਿ 432 ਪੰਨਿਆਂ ਦੀ ਇਸ  ਡਾਇਰੈਕਟਰੀ ’ਚ ਇਸ ਵਾਰ ਹੁਣ ਤੱਕ ਯਾਨੀ ਸਾਲ 1935 ਤੋਂ 2020 ਤੱਕ ਰਿਲੀਜ਼ ਹੋਈਆਂ ਫ਼ਿਲਮਾਂ ਦੀ ਜਾਣਕਾਰੀ ਵੀ  ਉਪਲਬਧ ਕਰਵਾਈ ਗਈ ਹੈ। ਇਹੀ ਨਹੀਂ ਇਸ ਤੋਂ ਇਲਾਵਾ ਫ਼ਿਲਮ ਬਣਾਉਣ ਦਾ ਪ੍ਰੋਸੈਸ ਕੀ ਹੈ। ਫ਼ਿਲਮ ਦਾ ਬਜਟ ਕਿਵੇਂ ਬਣਦਾ ਹੈ।  ਨੌਰਥ ਇੰਡੀਆ ’ਚ ਕਿਥੇ ਕਿਥੇ ਅਤੇ ਕਿੰਨੇ ਮਲਟੀਪਲੈਕਸ ਹਨ। ਹੁਣ ਤੱਕ ਕਿਹੜੀਆਂ ਫ਼ਿਲਮਾਂ ਨੂੰ ਨੈਸ਼ਨਲ ਐਵਾਰਡ ਹਾਸਲ ਹੋਇਆ। ਕਿਹੜਾ ਕਲਾਕਾਰ ਕਿਸ ਸਾਲ ਸਰਬੋਤਮ ਅਦਾਕਾਰ ਚੁਣਿਆ ਗਿਆ ਸਮੇਤ ਹੋਰ ਵੀ ਬਹੁਤ ਸਾਰੀ ਮਹੱਤਵਪੂਰਨ ਜਾਣਕਾਰੀ ਨੂੰ ਇਸ ਦਾ ਹਿੱਸਾ ਬਣਾਇਆ ਗਿਆ ਹੈ। ਇਸ ਮੌਕੇ ਕਾਮੇਡੀਅਨ ਗੁਰਪ੍ਰੀਤ ਘੁੱਗੀ ਨੇ ਕਿਹਾ ਕਿ ਪੰਜਾਬੀ ਸਿਨੇਮੇ ਦਾ ਦਾਇਰਾ ਵਿਸ਼ਾਲ ਹੋ ਚੁੱਕਾ ਹੈ। ਅਜਿਹੇ ’ਚ ਬਹੁਤ ਸਾਰੇ ਨਵੇਂ ਚਿਹਰੇ ਇਸ ਦਾ ਹਿੱਸਾ ਬਣ ਰਹੇ ਹਨ ਅਜਿਹੇ ਲੋਕਾਂ ਲਈ ਇਹ ਡਾਇਰੈਕਟਰੀ ਕਿਸੇ ਰੋਡਮੈਪ ਤੋਂ ਘੱਟ ਸਾਬਤ ਨਹੀਂ ਹੋਵੇਗੀ। ਡਾਇਰੈਕਟਰੀ ’ਚ ਸ਼ਾਮਲ ਪੰਜਾਬੀ ਸਿਨਮਾ ਅਤੇ ਫ਼ਿਲਮਾਂ ਦੀ ਜਾਣਕਾਰੀ  ਇਸ ਦੇ ਅਮੀਰ ਪਿਛੋਕੜ ਅਤੇ ਇਤਿਹਾਸ ਤੋਂ ਜਾਣੂ ਕਰਵਾਉਂਦੀ ਹੈ। ਇਹ ਡਾਇਰੈਕਟਰੀ ਹਰ ਪੱਖ ਤੋਂ ਮੱਹਤਵਪੂਰਨ ਅਤੇ ਸਾਂਭਣਯੋਗ ਹੈ। ਗਾਇਕ ਹਰਭਜਨ ਮਾਨ ਨੇ ਕਿਹਾ ਕਿ ਸਪਨ ਮਨਚੰਦਾ ਦਾ ਇਹ ਉਪਰਾਲਾ ਬੇਹੱਦ ਸ਼ਾਨਦਾਰ ਹੈ। ਇਸ ਡਾਇਰੈਕਟਰੀ ਦੀ ਮੱਦਦ ਨਾਲ ਬਹੁਤ ਸਾਰੇ ਕੰਮ ਆਸਾਨ ਤਾਂ ਹੁੰਦੇ ਹੀ ਸੀ ਬਲਕਿ ਹੁਣ ਇਸ ’ਚ ਸ਼ਾਮਲ ਪੰਜਾਬੀ ਸਿਨੇਮਾ ਦੇ ਇਤਿਹਾਸ ਦੀ ਮਹੱਤਵਪੂਰਨ ਵੀ ਸਭ ਤੱਕ ਪਹੁੰਚੇਗੀ ਜੋ ਕਿ ਸ਼ਲਾਘਾਯੋਗ ਕਦਮ ਹੈ। ਗਾਇਕ ਤੇ ਅਦਾਕਾਰ ਰਣਜੀਤ ਬਾਵਾ ਨੇ ਵੀ ਇਸ ਉਪਰਾਲੇ ਦੀ ਸ਼ਲਾਘਾ ਕਰਦਿਆਂ ਕਿਹਾ ਕਿ ਕਰੋੜਾਂ ਰੁਪਏ ਦੀ ਹੋ ਚੁੱਕੀ ਪੰਜਾਬੀ ਫ਼ਿਲਮ ਤੇ ਮਿਊਜ਼ਿਕ ਇੰਡਸਟਰੀ ਲਈ ਇਹ ਇਕ ਤੋਹਫਾ ਹੈ। ਉਨ੍ਹਾਂ ਕਿਹਾ ਕਿ ਇੰਡਸਟਰੀ ’ਚ ਵੱਖ ਵੱਖ ਤਰ੍ਹਾਂ ਦਾ ਕੰਮ ਕਰ ਕਰੇ ਲੋਕਾਂ ਦੀ ਜਾਣਕਾਰੀ ਇੱਕਠੀ ਕਰਨੀ ਅਤੇ ਫਿਰ ਉਸ ਨੂੰ ਕੈਟਾਗਿਰੀਜ਼ ਵਾਈਜ ਵੰਡ ਕੇ ਡਾਇਰੈਕਟਰੀ ’ਚ ਸ਼ਾਮਲ ਕਰਨਾ ਮੁਸ਼ਕਲ ਤੇ ਸ਼ਲਾਘਾਯੋਗ ਕੰਮ ਹੈ। ਇਸ ਨਾਲ ਕਈ ਤਰ੍ਹਾਂ ਦੇ ਕੰਮ ਆਸਾਨ ਹੁੰਦੇ ਹਨ। ਅਜਿਹੇ ਉਪਰਾਲੇ ਵੀ ਪੰਜਾਬੀ ਇੰਡਸਟਰੀ ਦੀ ਤਰੱਕੀ ’ਚ ਅਹਿਮ ਯੋਗਦਾਨ ਪਾਉਂਦੇ ਹਨ। ਪੰਜਾਬੀ ਮਨੋਰੰਜਨ ਜਗਤ ਲਈ ਪੰਜਾਬ ਫ਼ਿਲਮ ਸਿਟੀ ਦਾ ਨਿਰਮਾਣ ਕਰਨ ਵਾਲੇ ਇਕਬਾਲ ਚੀਮਾ ਨੇ ਵੀ ਕਿਹਾ ਕਿ ਹੁਣ ਪੰਜਾਬੀ ਇੰਡਸਟਰੀ ਸਿਰਫ ਪੰਜਾਬ ਜਾਂ ਪੰਜਾਬੀ ਲੋਕਾਂ ਤੱਕ ਸੀਮਿਤ ਨਹੀਂ ਰਹੀ ਬਲਕਿ ਹੋਰ ਖੇਤਰੀ ਭਾਸ਼ਾਵਾਂ ਅਤੇ ਹਿੰਦੀ ਫ਼ਿਲਮ ਇੰਡਸਟਰੀ ਵੀ ਪੰਜਾਬੀ ਇੰਡਸਟਰੀ ’ਚ ਦਿਲਚਸਪੀ ਰੱਖਦੀ ਹੈ। ਇਹੀ ਕਾਰਨ ਕਿ ਇਸ ਵੇਲੇ ਪੰਜਾਬੀ ਫ਼ਿਲਮਾਂ ਤੋਂ ਇਲਾਵਾ ਬਹੁਤ ਸਾਰੀਆਂ ਵੈਬ ਸੀਰੀਜ, ਡਿਜ਼ੀਟਲ ਫ਼ਿਲਮਾਂ ਅਤੇ ਟੀਵੀ ਸੀਰੀਅਲਾਂ ਦਾ ਪੰਜਾਬ ’ਚ ਨਿਰਮਾਣ ਹੋ ਰਿਹਾ ਹੈ। ਆਉਣ ਵਾਲੇ ਸਮੇਂ ’ਚ ਇਸ ਡਾਇਰੈਕਟਰੀ ਦੀ ਅਹਿਮੀਅਤ ਹੋਰ ਵੀ ਵਧੇਗੀ। 

Share Via

Total   159